About

លោក កែវ សារ៉ាត់ ឈ្មោះពិតរបស់លោកគឺ(ឈុំ តេះ) លោកមានស្រុកកំណើតកើតនៅភូមិ វត្តកំផែង ស្រុកបាត់ដំបង ខេត្តបាត់ដំបង លោកជាកូនទី២ ក្នុងចំណោមបងប្អូន៧នាក់ ឪពុករបស់លោកឈ្មោះ យ៉ត ឈុំ និងម្តាយរបស់លោកឈ្មោះ គ្រិត សារ៉ាន់ ដោយពួកគាត់ទាំងពីរ បានទទួលមរណៈភាពនៅក្នុងរបបប្រល័យពូជសាសន៍ ប៉ុលពត នៅក្នុងឆ្នាំ ១៩៧៧ ។ ក្រោយមកលោក កែវ សារ៉ាត់ បានរត់ភៀសខ្លួនទៅដល់ជុំរុំទឹកដីថៃ នៅទីនោះលោកបានរួមរស់ជាមួយនារីម្នាក់ និងបានទទួលចំណងដៃបុត្រមួយ ជាមួយគ្នាទៀតផង មិនយូរប៉ុន្មាននាងក៏នាំកូនរត់ចោលលោកបាត់ទៅ។ ក្រោយមកលោកក៏សំរេចចិត្តរៀបការជាមួយនារីម្នាក់ទៀតឈ្មោះ ចន្ធូ ហើយក៏បាននាំគ្នារត់ភៀសខ្លួនពីជុំរុំនោះទៅដល់ទឹកដី អាមេរិក ។ នៅក្នុងឆ្នាំ ១៩៨៥ លោកក៏ចាប់ផ្ដើមច្រៀងរកប្រាក់ដើម្បីទ្រទ្រង់គ្រួសារ លោកបានច្រៀងថតសំឡេងក្នុងកាសែត អោយផលិតកម្ម មយូរ៉ា បានប្រហែលជា ៤០ទៅ៥០បទ។ ក្រោយមកលោក កែវ សារ៉ាត់ ក៏បានងាកមកនិពន្ធបទចម្រៀង និងបង្កើតផលិតកម្មដោយខ្លួនឯង ដោយដាក់ឈ្មោះថា ជួងមាស និង ចាបមាស។ បទចម្រៀងដែលធ្វើអោយលោកមានកេរ្តិ៍ឈ្មោះល្បីល្បាញគ្រប់ទិសទីគឺបទ(ស្រណោះដីខ្មែរ) បទ(ពិសាខដើមឆ្នាំ) និងបទចម្រៀងជាច្រើនទៀត។ ក្រោយមកលោក កែវ សារ៉ាត់ បានទទួលមរណៈភាព នៅក្នុងខែ កញ្ញា ឆ្នាំ ១៩៩១ នៅទីក្រុង ឡងបិច កាលីហ្វ័រនីញ៉ា សហរដ្ឋអាមេរិក ដោយរោគថ្លើមប្រភេទ B ៕